विद्यार्थ्यांनो , मिळालेल्या संधीचं सोनं करा – प्र-कुलगुरू डॉ. महेंद्र ढोरे

संत गाडगे बाबा अमरावती विद्यापीठाच्या नवोपक्रम, नवसंशोधन व साहचर्य मंडळाची कार्यशाळा

अमरावती : “पूर्वीसारखी परिस्थिती आज राहिलेली नाही. एका क्लिकवर जगभरातील घडामोडी कळतात, अनेक सुविधा आणि शासनाच्या योजना विद्यार्थ्यांसाठी उपलब्ध आहेत. या संधींचं सोनं करा,” असा प्रेरणादायी सल्ला प्र-कुलगुरू डॉ. महेंद्र ढोरे यांनी दिला. संत गाडगे बाबा अमरावती विद्यापीठातील नवोपक्रम, नवसंशोधन व साहचर्य मंडळाच्यावतीने आयोजित विद्यार्थ्यांच्या कार्यशाळेत ते बोलत होते.

व्यासपीठावर प्रमुख अतिथी म्हणून अमरावतीतील अस्पा बंड सन्सचे संचालक श्री रणजीत बंड, वक्ते श्री शिवाजी धवड, विद्यापीठाचे वित्त व लेखा अधिकारी सीए. पुष्कर देशपांडे, तसेच मंडळाचे संचालक डॉ. अजय लाड उपस्थित होते.

प्रेरणादायी अनुभव व संदेश

• श्री रणजीत बंड यांनी तंत्रज्ञानाच्या झपाट्याने होत असलेल्या प्रगतीबाबत सांगत, “एक नवीन कल्पनाही भविष्यात मोठा आकार घेऊ शकते,” असे सांगितले. मारुती कार शो-रूम सुरू करतानाचे अनुभव आणि त्यावेळच्या अडचणी विद्यार्थ्यांसोबत शेअर करत त्यांनी इन्क्युबेशन सेंटरचे महत्त्व पटवून दिले.
• इन्क्युबेशन सेंटरचे मुख्य कार्यकारी अधिकारी श्री आनंद यादव यांनी स्टार्टअप्स व नवनिर्मितीसाठी इन्क्युबेशनचा उपयोग कसा करावा याचे मार्गदर्शन केले. “आयुष्यात अडचणी व अपयश येतात; पण घाबरू नका, लक्ष्य गाठेपर्यंत प्रवास सुरू ठेवा,” असा संदेश त्यांनी दिला.
• दुसऱ्या सत्रात प्रमुख वक्ते श्री शिवाजी धवड यांनी विद्यार्थ्यांना सखोल मार्गदर्शन केले.

कार्यशाळेची सुरुवात संत गाडगे बाबा यांच्या प्रतिमेचे पूजन, पुष्पार्पण व दीपप्रज्वलन करून विद्यापीठ गीताने झाली. प्रास्ताविकातून डॉ. अजय लाड यांनी कार्यशाळेच्या आयोजनामागील भूमिका स्पष्ट केली. सूत्रसंचालन विकास विभागाच्या उपकुलसचिव डॉ. सुलभा पाटील यांनी केले.

या कार्यशाळेला विद्यापीठाच्या विविध विभागांतील विद्यार्थी-विद्यार्थिनी मोठ्या संख्येने उपस्थित होते, ज्यामुळे सत्राला उत्साही वातावरण लाभले.