विद्यापीठ अनुदान आयोगाचा ऐतिहासिक निर्णय — एकाच वेळी दोन पदवी अभ्यासक्रमांना मंजुरी

नवी दिल्ली :विद्यार्थ्यांच्या शैक्षणिक स्वायत्ततेसाठी एक मोठा टप्पा गाठत, विद्यापीठ अनुदान आयोगाने (UGC) आपल्या ५८९व्या बैठकीत एकाच वेळी दोन पदवी अभ्यासक्रम पूर्ण करण्यास मान्यता दिली आहे. आयोगाने या निर्णयास सुधारित मार्गदर्शक तत्त्वांच्या माध्यमातून अधिकृत स्वरूप दिले असून, यामुळे देशभरातील लाखो विद्यार्थ्यांना नव्या संधींचा मार्ग खुला होणार आहे.

नवीन काय?
आतापर्यंत एकाच वेळी दोन डिग्री कोर्सेस पूर्ण करणाऱ्या विद्यार्थ्यांना याची मान्यता मिळत नव्हती. परंतु, ३ एप्रिल २०२५ रोजी झालेल्या बैठकीत, UGC ने हे नियम सुधारून, पूर्वलक्ष्यी प्रभाव (retrospective effect) देत, अशा विद्यार्थ्यांनाही आता मान्यता देण्याचा निर्णय घेतला आहे.

महत्वाच्या बाबी:

• सुधारित मार्गदर्शक तत्त्वे UGC च्या अधिसूचनेच्या तारखेपासून लागू होतील.
• जे विद्यार्थी यापूर्वी दोन अभ्यासक्रम एकत्र पूर्ण केले आहेत, त्यांनाही आता याला अधिकृत मान्यता मिळणार आहे.
• परंतु, यासाठी संबंधित फर्स्ट डिग्री किंवा मास्टर्स डिग्री कार्यक्रम, वैधानिक परिषदांचे नियम, संबंधित विद्यापीठांचे धोरण व यूजीसीच्या दुरस्थ शिक्षण ब्युरोचे नियम लागू असतील.

प्रशासनांना सूचना:
सर्व विद्यापीठे आणि संलग्न महाविद्यालयांना ही माहिती विद्यार्थ्यांपर्यंत पोहोचवून या नव्या मार्गदर्शक तत्त्वांची प्रभावी अंमलबजावणी करण्याचे निर्देश देण्यात आले आहेत.

विद्यार्थ्यांसाठी संधी:
या निर्णयामुळे आता विद्यार्थी एकाच वेळी कला आणि विज्ञान, वाणिज्य आणि अभियांत्रिकी किंवा इतर कोणत्याही दोन विविध शाखांमध्ये अभ्यास करू शकतील. शिक्षणाच्या क्षेत्रात ही लवचिकता आणि बहुविध संधी विद्यार्थ्यांच्या सर्वांगीण विकासासाठी उपयुक्त ठरणार आहे.