एमजीएम विद्यापीठात आयईईई’ च्या वूमन इन इंजिनियरिंग स्टूडेंट ब्रँचचे उद्घाटन संपन्न
‘एम्पॉवर्ड सिटीझन, वूमन लेड डेव्हपमेंट अंडर विकसित भारत @ २०४७ व्हिजन‘ कार्यशाळा यशस्वीपणे संपन्न
छत्रपती संभाजीनगर : महात्मा गांधी मिशन विद्यापीठाच्या युनिव्हर्सिटी डिपार्टमेंट ऑफ इन्फॉर्मेशन अँड कम्युनिकेशन टेक्नॉलॉजी मार्फत आयईईई’च्या वूमन इन इंजिनियरिंग स्टूडेंट ब्रँचचा उद्घाटन सोहळा आज विद्यापीठाच्या रुक्मिणी सभागृहात मान्यवरांच्या प्रमुख उपस्थितीत संपन्न झाला. हा सोहळा संपन्न झाल्यानंतर ‘एम्पॉवर्ड सिटीझन, वूमन लेड डेव्हपमेंट अंडर विकसित भारत @ २०४७ व्हिजन’ या विषयावर कार्यशाळेचे आयोजन करण्यात आले होते.
यावेळी या उद्घाटन सोहळ्यास मुख्य अतिथी म्हणून ग्राइंड मास्टर मशिनच्या व्यवस्थापकीय संचालक मोहिनी केळकर, सोशल मीडिया इन्फ्लुंसर शांभवी गुप्ता तर विद्यापीठाच्या वतीने कुलपती अंकुशराव कदम, कुलगुरु डॉ विलास सपकाळ, कुलसचिव डॉ. आशिष गाडेकर, विभागप्रमुख डॉ.शर्वरी तामणे, प्रा. विजया अहिरे, बी स्टुडंट ब्रँचचे प्रसाद वखरे, आदित्य बक्षी, वैष्णवी चौधरी, प्रेरणा वीर व सर्व संबंधित उपस्थित होते.
आयईईई’च्या वूमन इन इंजिनियरिंग ब्रँचचा उद्घाटन समारंभ सोहळा संपन्न झाल्यानंतर सोशल मीडिया इन्फ्लुंसर शांभवी गुप्ता यांनी ‘डेटा सायन्स डेमीस्टीफाईड’ तर ग्राइंड मास्टर मशिनच्या व्यवस्थापकीय संचालक मोहिनी केळकर यांनी ‘वूमन लीडरशिप इन इंडस्ट्री विकसित भारत @२०४७’ या विषयावर विद्यार्थ्यांशी संवाद साधला.
ग्राइंड मास्टर मशिनच्या व्यवस्थापकीय संचालक श्रीमती मोहिनी केळकर यावेळी बोलताना म्हणाल्या, आपल्या स्वत: च्या आतला आवाज ओळखून आपल्या करिअरचा निर्णय घेतला पाहिजे. कोणत्याही शाखेतआपण शिकत असू मात्र, मूलभूत गोष्टींचे ज्ञान आपल्याला असणे अत्यंत आवश्यक आहे. एकमेकांशी सहाय्यक आणि समूहाने एकत्रित काम करण्याचा दृष्टिकोण सर्वांनी बाळगत कार्यरत असणे आवश्यक आहे.आजच्या काळामध्ये काम करीत असताना कंटेंट महत्वपूर्ण घटक आहे.
समाजमाध्यमांचा वापर करीत असताना तो विचारपूर्वक करणे आवश्यक आहे. विशेषत: लिंक्डईन हे तुमचे परिचयपत्र आहे. या माध्यमातून जगासमोर आपण आपली ओळख निर्माण करीत असतो. समकालीन काळामध्ये नोकरीच्या शोधत असताना ‘फ्री लांसिंग’ हा एक करियरचा महत्वपूर्ण पर्याय आपल्यासमोर खुला असून या क्षेत्रात नोकरीच्या असंख्य संधी उपलब्ध आहेत. आपण आपली आवड जोपासत करियरची निवड करणे गरजेचे असून या प्रक्रियेतून जात असताना समाजाच्या बोलण्याचा विचार करण्याची गरज नसल्याचे प्रतिपादन सोशल मीडिया इन्फ्लुंसर शांभवी गुप्ता यांनी केले.
आजच्या कार्यक्रमात कुलगुरु डॉ विलास सपकाळ आणि कुलसचिव डॉ आशिष गाडेकर यांनीही यावेळी विद्यार्थ्यांशी संवाद साधला. कार्यक्रमाचे प्रास्ताविक प्रा. विजया अहिरे यांनी केले. कार्यक्रमाचे सूत्रसंचालन बस्वराज शिरसगावकर, स्वराली कुलकर्णी यांनी केले तर आभार प्रेरणा वीर यांनी मानले.
