सोलापूर विद्यापीठ कॅम्पसमध्ये मतदार जनजागृती रॅली
लोकशाही बळकट करण्याचा संदेश
सोलापूर | CampusKatta News | दि. ७ जानेवारी
लोकशाही प्रक्रियेत सुजाण, कर्तव्यदक्ष व जागरूक मतदार घडविण्याच्या उद्देशाने पुण्यश्लोक अहिल्यादेवी होळकर सोलापूर विद्यापीठात मतदार जनजागृती रॅलीचे भव्य आयोजन करण्यात आले. ही रॅली स्त्रीशक्ती स्वयंसिद्धा केंद्र व राष्ट्रीय सेवा योजना (NSS) विभाग यांच्या संयुक्त विद्यमाने ‘मतदार जनजागृती अभियान’ अंतर्गत घेण्यात आली.
विद्यापीठ प्रशासनाची उपस्थिती, घोषणांनी दुमदुमला परिसर
या प्रसंगी विद्यापीठाचे कुलगुरू डॉ. प्रकाश महानवर, प्र-कुलगुरू डॉ. लक्ष्मीकांत दामा तसेच प्रभारी कुलसचिव डॉ. अतुल लकडे उपस्थित होते. विद्यापीठ परिसरातून काढण्यात आलेल्या या रॅलीत
“मतदान हा अधिकारच नव्हे तर कर्तव्य आहे”,
“लोकशाही बळकट करूया”
अशा घोषणांनी संपूर्ण परिसर दुमदुमून गेला.
मतदानाचे महत्त्व अधोरेखित
यावेळी कौशल्य विकास केंद्राचे समन्वयक डॉ. प्रभाकर कोळेकर यांनी विद्यार्थ्यांना मार्गदर्शन करताना मतदानाचे महत्त्व स्पष्ट केले.
लोकशाही मूल्यांचे संरक्षण, जबाबदारीने मतदान करणे आणि विकसित भारताच्या संकल्पपूर्तीसाठी मतदान जनजागृती अत्यावश्यक असल्याचे त्यांनी अधोरेखित केले.
विद्यार्थी, प्राध्यापक व कर्मचाऱ्यांचा उत्स्फूर्त सहभाग
या उपक्रमाचे यशस्वी आयोजन स्त्रीशक्ती स्वयंसिद्धा केंद्राच्या समन्वयक डॉ. अंजना लावंड यांच्या मार्गदर्शनाखाली करण्यात आले. विद्यापीठातील विविध विभागांतील विद्यार्थी, अध्यापक व कर्मचारी यांनी मोठ्या संख्येने सहभाग नोंदवला.
राज्यस्तरीय ‘उत्कर्ष २०२५-२६’ स्पर्धेतील विद्यार्थ्यांचाही सहभाग
उच्च व तंत्र शिक्षण विभाग, महाराष्ट्र शासन आणि राष्ट्रीय सेवा योजना यांच्या संयुक्त विद्यमाने आयोजित
‘१६ वी राज्यस्तरीय सामाजिक व सांस्कृतिक स्पर्धा – उत्कर्ष २०२५-२६’ मध्ये सहभागी झालेल्या राज्यातील १६ विद्यापीठांच्या विद्यार्थ्यांनी देखील या मतदार जनजागृती रॅलीत सहभाग घेतला.
या अभियानाच्या माध्यमातून मतदान हे केवळ अधिकार नसून प्रत्येक नागरिकाचे कर्तव्य आहे, ही भावना सहभागींच्या मनात दृढ करण्यात आली.
कार्यक्रमाच्या यशस्वितेसाठी विशेष योगदान
कार्यक्रम यशस्वी करण्यासाठी
राष्ट्रीय सेवा योजना समन्वयक डॉ. राजेंद्र वडजे,
विद्यार्थी विकास केंद्राचे समन्वयक डॉ. केदारनाथ काळवणे आणि
डॉ. विनायक धुळप यांनी विशेष परिश्रम घेतले.
