अकरावा अजिंठा वेरूळ आंतरराष्ट्रीय चित्रपट महोत्सव २८ जानेवारी पासून

पद्मविभूषण इलयाराजा यांना यंदाचा पद्मपाणि पुरस्कार जाहीर

छत्रपती संभाजीनगर : भारतीय चित्रपटसंगीताला जागतिक उंचीवर नेणारे ज्येष्ठ भारतीय संगीतकार, पद्मविभूषण इलयाराजा यांना यंदाचा प्रतिष्ठेचा पद्मपाणि पुरस्कार जाहीर करण्यात आला आहे. हा पुरस्कार अकराव्या अजिंठा वेरूळ आंतरराष्ट्रीय चित्रपट महोत्सव २०२६ मध्ये मान्यवरांच्या हस्ते प्रदान करण्यात येणार आहे.

बुधवार, दि. २८ जानेवारी ते रविवार, दि. ०१ फेब्रुवारी २०२६ या कालावधीत छत्रपती संभाजीनगर येथे होणाऱ्या या आंतरराष्ट्रीय चित्रपट महोत्सवाची अधिकृत घोषणा करण्यात आली आहे. या महोत्सवाचे संस्थापक व संयोजन समितीचे अध्यक्ष नंदकिशोर कागलीवाल, प्रमुख मार्गदर्शक अंकुशराव कदम आणि मानद अध्यक्ष आशुतोष गोवारीकर यांनी पद्मपाणि पुरस्काराबाबत माहिती दिली.

🎖️ पद्मपाणि पुरस्कार वितरण सोहळा

बुधवार, दि. २८ जानेवारी २०२६ रोजी सायंकाळी ५:३० वाजता,
रुक्मिणी सभागृह, एमजीएम परिसर, छत्रपती संभाजीनगर येथे महोत्सवाच्या उद्घाटनप्रसंगी पद्मपाणि पुरस्कार प्रदान करण्यात येणार आहे.
त्यानंतर महोत्सवाचे चित्रपट प्रदर्शन पुढील पाच दिवस आयनॉक्स, प्रोझोन मॉल येथे होणार आहे.

🎶 इलयाराजा यांचे अतुलनीय संगीत योगदान

गेल्या पाच दशकांहून अधिक काळ भारतीय चित्रपटसंगीत क्षेत्रात कार्यरत असलेल्या इलयाराजा यांनी आतापर्यंत

• ७,००० पेक्षा अधिक गाणी
• १,५०० हून अधिक चित्रपटांसाठी संगीत
  निर्माण केले आहे.

तामिळ, तेलुगू, मल्याळम, कन्नड, हिंदी, मराठी आदी भाषांमधील त्यांच्या संगीतरचना रसिकांच्या मनात अढळ स्थान निर्माण करतात. कर्नाटकी व हिंदुस्थानी शास्त्रीय संगीत, लोकसंगीत आणि पाश्चात्त्य सिम्फनी यांचा सुरेल संगम हे त्यांच्या संगीतातील वैशिष्ट्य आहे. पार्श्वसंगीतातून चित्रपटातील भावनांना खोलवर स्पर्श करण्याची विलक्षण क्षमता ही त्यांची ओळख आहे.
याचमुळे ते जनमानसात ‘इसैग्नानी’ (संगीतातील ऋषीतुल्य व्यक्तिमत्त्व) म्हणून ओळखले जातात.

🏆 पद्मपाणि पुरस्कार निवड समिती

पद्मपाणि पुरस्कार निवड समितीच्या अध्यक्षपदी ज्येष्ठ समीक्षक लतिका पाडगांवकर होत्या.
समितीचे सदस्य –

• आशुतोष गोवारीकर
• सुनील सुकथनकर
• चंद्रकांत कुलकर्णी

पुरस्काराचे स्वरूप –
✔️ पद्मपाणि सन्मानचिन्ह
✔️ सन्मानपत्र
✔️ ₹ २ लाख रोख रक्कम

🎥 भव्य आयोजन, राष्ट्रीय-आंतरराष्ट्रीय सहभाग

नाथ ग्रुप, एमजीएम विद्यापीठ व यशवंतराव चव्हाण सेंटर प्रस्तुत आणि मराठवाडा आर्ट, कल्चर अँड फिल्म फाउंडेशन आयोजित हा महोत्सव

• केंद्रीय सूचना व प्रसारण मंत्रालय, भारत सरकार
• सांस्कृतिक कार्य विभाग, महाराष्ट्र शासन
  यांच्या सहकार्याने संपन्न होत आहे.

एनएफडीसी, महाराष्ट्र चित्रपट, रंगभूमी व सांस्कृतिक विकास महामंडळ, तसेच प्रोझोन मॉल यांचे विशेष सहकार्य लाभले आहे.
सॉलीटेअर टॉवर्स, कालिका स्टील, डेली हंट हे सहआयोजक आहेत.

मराठवाड्याचे नाव जागतिक चित्रपट नकाशावर अधोरेखित करणाऱ्या या महोत्सवात देशभरातील चित्रपट रसिकांनी मोठ्या संख्येने सहभाग नोंदवावा, असे आवाहन आयोजकांनी केले आहे.