‘स्वारातीम’ विद्यापीठातर्फे एनपीटीईएल ऑनलाईन कोर्सेसकरिता जागरूकता कार्यशाळेचे आयोजन

नांदेड : भारत सरकारच्या मनुष्यबळ विकास मंत्रालयाच्या अंतर्गत सुरु करण्यात आलेल्या आणि विद्यार्थ्यांसाठी अतिशय उपयुक्त ठरलेल्या ‘स्वयम-एनपीटीईएल’ (नॅशनल प्रोग्रॉम ऑन टेक्नोलॉजी इनहॅन्स्ड लर्निंग) ऑनलाईन कोर्सेसच्या जागरूकतेसाठी स्वामी रामानंद तीर्थ मराठवाडा विद्यापीठातील गणितीयशास्त्रे संकुल आणि मद्रास येथील आयआयटी यांच्या संयुक्त विद्यमाने दि ४ जुलै रोजी एकदिवसीय ऑनलाईन राष्ट्रीय कार्यशाळेचे आयोजन करण्यात आले आहे.

विद्यापीठातून प्रचलित शिक्षण घेत असताना आपण नामांकित आयआयटी, आयआयएस्सी येथील प्राध्यापकांकडून देखील ज्ञानार्जन  करू शकतो व  त्याद्वारे विविध शाखांतील नवनवीन  ज्ञान अर्जित करू शकतो. हे स्वयम-एनपीटीईएल च्या विविध कोर्सेस ची वैशिष्ट्ये आहेत. राष्ट्रीय शैक्षणिक धोरण-२०२० अंतर्गत सदर एनपीटीईएल ऑनलाईन कोर्सेसला अनन्यसाधारण महत्व प्राप्त झालेले आहे.

या कार्यशाळेत ऑनलाईन कोर्सेसला नावनोंदणी कशी करावी तसेच या कोर्सेसद्वारे इंटर्नशिपचा लाभ कसा घ्यावा,  स्वयम-एनपीटीईएल लोकल चाप्टर महाविद्यालयात कसा स्थापित करावा तसेच  विद्यापीठ अनुदान आयोगाच्या मार्गदर्शक तत्वांना अनुसरून श्रेयांक हस्तांतरण प्रणाली (Credit transfer Policy) चा लाभ कसा घ्यावा, इत्यादी अनेकविध पैलूंवर आयआयटी, मद्रास येथील साधन व्यक्ती तसेच ‘स्वारातीम’ विद्यापीठाचे कुलगुरू उपस्थितांना मार्गदर्शन करणार आहेत. सदर कार्यशाळा ही  सर्वांसाठी पूर्णतः मोफत असून या कार्यशाळेचा लाभ युट्युब लाईव्ह द्वारे दि ४ जुलै रोजी स १०:०० वा पासून https://youtube.com/live/b_FTtxyop1M?feature=share या लिंकद्वारे सर्वाना घेता येईल. या कायशाळेत सहभागी होण्यासाठी कुठल्याही पूर्वनोंदणीची आवशक्यता नाही.

कार्यशाळेच्या अधिक माहितीसाठी विद्यापीठ संकेतस्थळाला भेट द्यावी, तसेच या कार्यशाळेचा लाभ अधिकाधिक विद्यार्थी व पालकांनी  घ्यावा, असे विद्यापीठाच्या वतीने कळविण्यात आले आहे.