गोंडवाना विद्यापीठातील भौतिकशास्त्र विभागाच्या विद्यार्थ्यांची इंटर्नशिप पूर्ण
गडचिरोली, 10 मार्च 2025: गोंडवाना विद्यापीठातील एम.एस.सी. द्वितीय वर्ष भौतिकशास्त्राच्या विद्यार्थ्यांची एक महिन्याची इंटर्नशिप 10 मार्च 2025 रोजी सफलतापूर्वक पूर्ण झाली. ही इंटर्नशिप गडचिरोली जिल्ह्यातील सेंटर फॉर इन्व्हेंशन, इनोव्हेशन, इन्क्युबेशन ॲण्ड ट्रेनिंग सेंटर (सीआयआयआयटी) येथे आयोजित केली गेली होती. या केंद्राची उभारणी इंडस्ट्री 4.0 च्या अनुषंगाने उद्योग आधारित प्रशिक्षणाला चालना देण्यासाठी करण्यात आली होती.
इंटर्नशिप अंतर्गत विद्यार्थ्यांना लेझर तंत्रज्ञानावर प्रत्यक्ष कामाचे प्रशिक्षण दिले गेले, ज्यात डिझाईन, उत्पादन आणि संबंधित तंत्रज्ञानाच्या इतर बाबींचा समावेश होता. विद्यार्थ्यांना यामध्ये अत्याधुनिक तंत्रज्ञानाचे उपयोग समजावून सांगितले गेले आणि त्यांना व्यावसायिक कौशल्ये शिकवली गेली.
समारोप समारंभात केंद्राचे समन्वयक डॉ. कृष्णा कारू यांनी विद्यार्थ्यांना शिकलेल्या कौशल्यांचे आर्थिक फायदे कसे मिळवता येतील यावर भाष्य केले आणि नव्या शोधांचे महत्त्व सांगितले. यासोबतच, टी अँड पी समन्वयक डॉ. उत्तमचंद कांबळे यांनी विद्यार्थ्यांना व्यवसाय सुरू करण्यासाठी मार्गदर्शन केले आणि बाजाराच्या दिशेची माहिती दिली.
भौतिकशास्त्र विभागाचे समन्वयक डॉ. सुनील बागडे यांनी विद्यार्थ्यांना मार्गदर्शन करत त्यांचा उत्साह वाढवला. विद्यार्थ्यांनी एक महिन्याचा अनुभव सादर करत, असे नाविन्यपूर्ण उपक्रम पुन्हा राबवायची इच्छा व्यक्त केली. प्रशिक्षक आदित्य कोल्हटकर आणि बोरीवार यांसह सर्व विद्यार्थी या कार्यक्रमाला उपस्थित होते.
टी अँड पी समन्वयक आणि भौतिकशास्त्र विभागाच्या प्राध्यापिका डॉ. अपर्णा भाके यांच्या आभार प्रदर्शनाने समारोप समारंभ संपन्न झाला.
