महात्मा फुले कृषी विद्यापीठात ३ अधिकारी व कर्मचारी सेवानिवृत्त
राहुरी– महात्मा फुले कृषी विद्यापीठ, राहुरी येथे नोव्हेंबर महिन्यात ३ अधिकारी व कर्मचारी सेवानिवृत्त झाले. यानिमित्त विद्यापीठात सेवानिवृत्ती सत्कार व लाभ वितरणाचा विशेष कार्यक्रम आयोजित करण्यात आला होता. कार्यक्रमाच्या अध्यक्षस्थानी विद्यापीठाचे कुलगुरू डॉ. पी. जी. पाटील होते. कुलगुरू डॉ. पाटील यांनी आपल्या मार्गदर्शनात सेवानिवृत्त कर्मचाऱ्यांच्या कार्याचा गौरवपूर्ण उल्लेख करत म्हटले, “आपली ताकद विधायक कामांसाठी वापरली तर आपले जीवन सार्थक होईल. कामाचा ताण न घेता नेहमी हसतमुख राहून प्रामाणिकपणे कार्य करणे महत्त्वाचे आहे.”
कार्यक्रमात सेवानिवृत्त डॉ. मुकुंद शिंदे आणि श्री. लुईस पाळंदे यांचा सत्कार करण्यात आला. डॉ. शिंदे यांनी आपल्या कार्यकाळातील अनुभव शेअर करत सांगितले की, “विद्यापीठातील कामकाजाची संस्कृती अतिशय प्रेरणादायक आहे. सुरुवातीच्या दिवसांतील मेहनत भविष्यातील यशाचा पाया असते.” डॉ. गोरक्ष ससाणे, संशोधन संचालक डॉ. विठ्ठल शिर्के, आणि अधिष्ठाता डॉ. साताप्पा खरबडे यांनीही सेवानिवृत्त कर्मचाऱ्यांच्या योगदानाचा विशेष उल्लेख केला. डॉ. ससाणे म्हणाले, “डॉ. शिंदे यांनी शैक्षणिक क्षेत्रात एकनिष्ठपणा दाखवला आणि कास्ट प्रकल्पाच्या माध्यमातून विद्यापीठाच्या कार्याचा दर्जा उंचावला.”
कार्यक्रमाच्या यशस्वी आयोजनासाठी उपकुलसचिव श्री. विजय पाटील, सहाय्यक कुलसचिव श्री. सागर पेंडभाजे, श्री. बाळासाहेब पाटील, श्रीमती शैला पटेकर, आणि श्रीमती शिल्पा चतारे यांनी अथक प्रयत्न केले.कार्यक्रमाचे सूत्रसंचालन व आभारप्रदर्शन श्री. संजय रुपनर यांनी केले. या प्रसंगी अनेक अधिकारी व कर्मचाऱ्यांनी उपस्थित राहून आपल्या भावना व्यक्त केल्या.
विद्यापीठाच्या सेवानिवृत्ती लाभ वितरण प्रणालीची प्रशंसा करत, उपस्थित मान्यवरांनी हा उपक्रम भविष्यातही यशस्वीपणे राबवण्याचा विश्वास व्यक्त केला.
